kab samundar hun kahan dariya hun main

kab samundar huuñ kahāñ dariyā huuñ maiñ

apne hī kirdār meñ Duubā huuñ maiñ

merī fitrat hai sadāqat kī amiiñ

sach ko sach kahne se kab jhijkā huuñ maiñ

raat din kyoñ ho ta'āqub meñ mire

chhū na pāoge bahut ūñchā huuñ maiñ

jis kahānī kā maiñ ik kirdār thā

vo kahānī ab samajh paayā huuñ maiñ

saarī duniyā ik taraf maiñ ik taraf

lo ḳharīdo kis qadar sastā huuñ maiñ

aaj bhī insāniyat ke naam par

mil ke ik insān se royā huuñ maiñ

toḌnā yuuñ mujh ko mushkil hai 'atīq'

sach kī ūñchī shāḳh pe phaltā huuñ maiñ

kab samundar hun kahan dariya hun main

apne hi kirdar mein Duba hun main

meri fitrat hai sadaqat ki amin

sach ko sach kahne se kab jhijka hun main

raat din kyon ho ta'aqub mein mere

chhu na paoge bahut uncha hun main

jis kahani ka main ek kirdar tha

wo kahani ab samajh paya hun main

sari duniya ek taraf main ek taraf

lo KHarido kis qadar sasta hun main

aaj bhi insaniyat ke nam par

mil ke ek insan se roya hun main

toDna yun mujh ko mushkil hai 'atiq'

sach ki unchi shaKH pe phalta hun main