kab se mauhum umidon ka sila rakkha hai

kab se mauhūm umīdoñ kā sila rakkhā hai

terī yādoñ kā bahut ūñchā diyā rakkhā hai

sun ke majbūr-e-tamannā kī sisaktī aaheñ

loriyāñ de ke use dil ne sulā rakkhā hai

umr guzrī hai magar ḳhud se judā kar na sake

bhūlne vaale tirī yaad meñ kyā rakkhā hai

sāqiyā muhr-ba-lab kar ke sila kyā paayā

hashr kuchh aur ḳhamoshī ne bapā rakkhā hai

yaad bhī kar na sake bhuul bhī paa.e na jise

ik vahī ahd vo paimān-e-vafā rakkhā hai

us kī ta.abīr bhalā kaun karegā 'sādiq'

jāgtī āñkhoñ ne jo ḳhvāb sajā rakkhā hai

kab se mauhum umidon ka sila rakkha hai

teri yaadon ka bahut uncha diya rakkha hai

sun ke majbur-e-tamanna ki sisakti aahen

loriyan de ke use dil ne sula rakkha hai

umr guzri hai magar KHud se juda kar na sake

bhulne wale teri yaad mein kya rakkha hai

saqiya muhr-ba-lab kar ke sila kya paya

hashr kuchh aur KHamoshi ne bapa rakkha hai

yaad bhi kar na sake bhul bhi pae na jise

ek wahi ahd wo paiman-e-wafa rakkha hai

us ki tabir bhala kaun karega 'sadiq'

jagti aankhon ne jo KHwab saja rakkha hai