kab se phira raha hai junun ku-ba-ku hamein

kab se phirā rahā hai junūñ kū-ba-kū hameñ

kar lo kabhī ḳhudā ke liye rū-ba-rū hameñ

bujhtā huā charāġh hai sūraj ke sāmne

le aa.ī hai kahāñ pe rah-e-ārzū hameñ

karte haiñ ik sarāb se bāteñ ham āj-kal

zamzam kī regzār meñ hai justujū hameñ

Duube haiñ kyoñ anā ke samundar meñ sargirāñ

hastī kī musta.ār milī aabjū hameñ

sub.h-e-azal jo aap hue ham se ham-kalām

yaad aa rahī hai aaj vahī guftugū hameñ

pheñkā thā jo kisī kī taraf ham ne ek din

patthar lagā hai aa ke vahī hū-ba-hū hameñ

kamzor ham hue haiñ ki bachche baḌe hue

dete haiñ vo javāb abhī dū-badū hameñ

hone lagā hai aaj 'hidāyat' nasha haran

karne lagā hai ishq jo be-ābrū hameñ

kab se phira raha hai junun ku-ba-ku hamein

kar lo kabhi KHuda ke liye ru-ba-ru hamein

bujhta hua charagh hai suraj ke samne

le aai hai kahan pe rah-e-arzu hamein

karte hain ek sarab se baaten hum aaj-kal

zamzam ki regzar mein hai justuju hamein

Dube hain kyon ana ke samundar mein sargiran

hasti ki mustaar mili aabju hamein

subh-e-azal jo aap hue hum se ham-kalam

yaad aa rahi hai aaj wahi guftugu hamein

phenka tha jo kisi ki taraf hum ne ek din

patthar laga hai aa ke wahi hu-ba-hu hamein

kamzor hum hue hain ki bachche baDe hue

dete hain wo jawab abhi du-badu hamein

hone laga hai aaj 'hidayat' nasha haran

karne laga hai ishq jo be-abru hamein