kab se shab-e-firaq talash-e-sahar mein hai

kab se shab-e-firāq talāsh-e-sahar meñ hai

sūraj mire nasīb kā lambe safar meñ hai

mahrūmiyoñ kī dhuup se tapte haiñ bām-o-dar

māhaul sāzgār kahāñ mere ghar meñ hai

phir tishnagī hai qaus-e-quzah kā samāñ liye

āb-e-ravāñ hai aañkh meñ sahrā nazar meñ hai

fānūs jagmagā.e hue haiñ makān ke

kaa.ī magar jamī huī dīvār-o-dar meñ hai

sab hī mirī talāsh meñ nikle haiñ har taraf

'tālib' kahīñ chhupā huā apnī nazar meñ hai

kab se shab-e-firaq talash-e-sahar mein hai

suraj mere nasib ka lambe safar mein hai

mahrumiyon ki dhup se tapte hain baam-o-dar

mahaul sazgar kahan mere ghar mein hai

phir tishnagi hai qaus-e-quzah ka saman liye

aab-e-rawan hai aankh mein sahra nazar mein hai

fanus jagmagae hue hain makan ke

kai magar jami hui diwar-o-dar mein hai

sab hi meri talash mein nikle hain har taraf

'talib' kahin chhupa hua apni nazar mein hai