کب تک ہوائے شوق سے دل کو بچایئے

کب تک ہوائے شوق سے دل کو بچایئے

موسم کا جو بھی مشورہ ہو مان جائیے

پی ہے اگر شراب تو کچھ لطف اٹھائیے

کیوں اتنی احتیاط ذرا لڑکھڑائیے

لینے نہ دے گی چین محبت کی تیز آنچ

چھینٹوں سے اس کو آج ہوس کے بجھائیے

اتنا لحاظ روح کا اور اتنی فربہی

جھوٹا ہے شیخ باتوں میں اس کی نہ آئیے

وہ با وفا نہیں نہ سہی خوش ادا تو ہے

گر کچھ نہیں تو حظ نظر ہی اٹھائیے

واعظ بیان خلد بہت خوب ہے مگر

اک روز اس کی بزم میں بھی ہو کے آئیے