kab tak wo mohabbat ko nibhata nazar aata

kab tak vo mohabbat ko nibhātā nazar aatā

ab maiñ bhī nahīñ jaan se jaatā nazar aatā

tum to mirī har samt havāoñ kī tarah ho

mausam koī furqat kā jo aatā nazar aatā

hai raushnī itnī ki dikhā.ī hī na kuchh de

varna hameñ is taaq meñ daatā nazar aatā

chaltī zarā tezī se havā to maiñ patañgeñ

kuchh aur bulandī pe uḌātā nazar aatā

manzar meñ tajassus hai na jaadū na kashish hai

hote to ye vo ḳhvāb dikhātā nazar aatā

maiñ vaqt kī suuī se bañdhā rahtā huuñ varna

sahrā meñ bahut ret uḌātā nazar aatā

aao zarā is samt se dekho vo zamīñ hai

har ek hai duuje ko miTātā nazar aatā

'zīshān' butoñ meñ jo koī zindagī hotī

maiñ sab se zabardast banātā nazar aatā

kab tak wo mohabbat ko nibhata nazar aata

ab main bhi nahin jaan se jata nazar aata

tum to meri har samt hawaon ki tarah ho

mausam koi furqat ka jo aata nazar aata

hai raushni itni ki dikhai hi na kuchh de

warna hamein is taq mein data nazar aata

chalti zara tezi se hawa to main patangen

kuchh aur bulandi pe uData nazar aata

manzar mein tajassus hai na jadu na kashish hai

hote to ye wo KHwab dikhata nazar aata

main waqt ki sui se bandha rahta hun warna

sahra mein bahut ret uData nazar aata

aao zara is samt se dekho wo zamin hai

har ek hai duje ko miTata nazar aata

'zishan' buton mein jo koi zindagi hoti

main sab se zabardast banata nazar aata