kab talak baiTha rahega ye jahan dar par mere

kab talak baiThā rahegā ye jahāñ dar par mire

aur kitne din rahegā āsmāñ sar par mire

mo.ajiza qismat kā hai yā hai ye hāthoñ kā hunar

aa girā merā jigar hī aaj nashtar par mire

chhaTpaTātā hai bechāra reg-zāroñ se ghirā

koī to dast-e-karam hotā samundar par mire

jo jahāñ par hai vahīñ par ghul rahā hai din-ba-din

chhā ga.ī hai be-hisī kī gard manzar par mire

go ki rakhtā huuñ maiñ dushman se hifāzat ke liye

naam to merā magar likkhā hai ḳhanjar par mire

DhūñDhtā phirtā huuñ apnā ghar maiñ shahr-e-ḳhvāb meñ

raat phir sotā hai koī aur bistar par mire

kab talak baiTha rahega ye jahan dar par mere

aur kitne din rahega aasman sar par mere

moajiza qismat ka hai ya hai ye hathon ka hunar

aa gira mera jigar hi aaj nashtar par mere

chhaTpaTata hai bechaara reg-zaron se ghira

koi to dast-e-karam hota samundar par mere

jo jahan par hai wahin par ghul raha hai din-ba-din

chha gai hai be-hisi ki gard manzar par mere

go ki rakhta hun main dushman se hifazat ke liye

nam to mera magar likkha hai KHanjar par mere

DhunDhta phirta hun apna ghar main shahr-e-KHwab mein

raat phir sota hai koi aur bistar par mere