kab talak chalna hai yun hi ham-safar se baat kar

kab talak chalnā hai yuuñ hī ham-safar se baat kar

manzileñ kab tak mileñgī rahguzar se baat kar

tujh ko mil jā.egā tere sab savāloñ kā javāb

kashtiyāñ kyuuñ Duub jaatī haiñ bhañvar se baat kar

kab talak chhuptā rahegā yuuñ hī apne-āp se

aa.ine ke rū-ba-rū aa apne Dar se baat kar

baḌh chukī haiñ ab tirī fikr-o-nazar kī vus.ateñ

jugnuoñ ko chhoḌ ab shams o qamar se baat kar

is tarah to aur bhī terī ghuTan baḌh jā.egī

ham-navā koī nahīñ to bām-o-dar se baat kar

dard kyā hai ye samajhnā hai to apne dil se pūchh

āñsuoñ kī baat hai to chashm-e-tar se baat kar

har safar manzar se pas-e-manzar talak to kar liyā

dekhnā kyā chāhtī hai ab nazar se baat kar

dhuup kaise saa.e meñ tabdīl hotī hai yahāñ

is hunar ko sīkhnā hai to shajar se baat kar

zaḳhm poshīda rahā to dard baḌhtā jā.egā

be-takalluf ho ke apne chāra-gar se baat kar

kab talak chalna hai yun hi ham-safar se baat kar

manzilen kab tak milengi rahguzar se baat kar

tujh ko mil jaega tere sab sawalon ka jawab

kashtiyan kyun Dub jati hain bhanwar se baat kar

kab talak chhupta rahega yun hi apne-ap se

aaine ke ru-ba-ru aa apne Dar se baat kar

baDh chuki hain ab teri fikr-o-nazar ki wusaten

jugnuon ko chhoD ab shams o qamar se baat kar

is tarah to aur bhi teri ghuTan baDh jaegi

ham-nawa koi nahin to baam-o-dar se baat kar

dard kya hai ye samajhna hai to apne dil se puchh

aansuon ki baat hai to chashm-e-tar se baat kar

har safar manzar se pas-e-manzar talak to kar liya

dekhna kya chahti hai ab nazar se baat kar

dhup kaise sae mein tabdil hoti hai yahan

is hunar ko sikhna hai to shajar se baat kar

zaKHm poshida raha to dard baDhta jaega

be-takalluf ho ke apne chaara-gar se baat kar