kab talak hum ko na aawega nazar dekhen to

kab talak ham ko na āvegā nazar dekheñ to

kaise tarsātā hai ye dīda-e-tar dekheñ to

ishq meñ us ke ki guzre haiñ sar o jaan se ham

apnī kis taur se hotī hai guzar dekheñ to

kar ke vo jaur-o-sitam hañs ke lagā ye kahne

aah o afġhāñ kā tirī ham bhī asar dekheñ to

sabr ho saktā hai kab ham se vale maslahatan

āzmā.ish dil-e-betāb kī kar dekheñ to

Dhab chaḌhe ho mire tum aaj hī to muddat baad

jā.eñge aap kahāñ aur kidhar dekheñ to

kis dilerī se kare hai tū fidā jaan us par

dil-e-jāñ-bāz tirā ham bhī hunar dekheñ to

kyā majāl apnī jo kuchh kah sakeñ ham tujh se aur

tujh ko bhar kar nazar ai shoḳh pisar dekheñ to

ho chalīñ ḳhīra to aḳhtar-shumarī se āñkheñ

shab hamārī bhī kabhī hogī sahar dekheñ to

ishq ke sadme uThāne nahīñ āsāñ 'hasrat'

kar sake koī hamārā sā jigar dekheñ to

kab talak hum ko na aawega nazar dekhen to

kaise tarsata hai ye dida-e-tar dekhen to

ishq mein us ke ki guzre hain sar o jaan se hum

apni kis taur se hoti hai guzar dekhen to

kar ke wo jaur-o-sitam hans ke laga ye kahne

aah o afghan ka teri hum bhi asar dekhen to

sabr ho sakta hai kab hum se wale maslahatan

aazmaish dil-e-betab ki kar dekhen to

Dhab chaDhe ho mere tum aaj hi to muddat baad

jaenge aap kahan aur kidhar dekhen to

kis dileri se kare hai tu fida jaan us par

dil-e-jaan-baz tera hum bhi hunar dekhen to

kya majal apni jo kuchh kah saken hum tujh se aur

tujh ko bhar kar nazar ai shoKH pisar dekhen to

ho chalin KHira to aKHtar-shumari se aankhen

shab hamari bhi kabhi hogi sahar dekhen to

ishq ke sadme uThane nahin aasan 'hasrat'

kar sake koi hamara sa jigar dekhen to