kab talak hamari sai-e-amal raegan rahe

kab talak hamārī sa.ī-e-amal rā.egāñ rahe

kab tak ġhubār-e-dīda-o-dil rā.egāñ rahe

āsūda-bayāñ to hazāroñ haiñ bazm meñ

lekin vo bad-nasīb jo tishna-bayāñ rahe

hai ab zabān-e-ḳhalq unhīñ kī fasāna-ḳhvāñ

kal tak tire itaab meñ jo be-zabāñ rahe

kyā zikr aish-rafta-e-ahd-e-bahār kā

ġham bhī mujhe qubūl hai gar jāvedāñ rahe

kyā ehtiyāt-e-sāġhar-o-mīnā karūñ ki jab

barbādiyoñ meñ sāzish-e-pīr-e-muġhāñ rahe

'sūfī' chaman meñ koshish-e-paiham ke bāvajūd

jo phuul nauha-ḳhvāñ the yūñhī nauha-ḳhvāñ rahe

kab talak hamari sai-e-amal raegan rahe

kab tak ghubar-e-dida-o-dil raegan rahe

aasuda-bayan to hazaron hain bazm mein

lekin wo bad-nasib jo tishna-bayan rahe

hai ab zaban-e-KHalq unhin ki fasana-KHwan

kal tak tere itab mein jo be-zaban rahe

kya zikr aish-rafta-e-ahd-e-bahaar ka

gham bhi mujhe qubul hai gar jawedan rahe

kya ehtiyat-e-saghar-o-mina karun ki jab

barbaadiyon mein sazish-e-pir-e-mughan rahe

'sufi' chaman mein koshish-e-paiham ke bawajud

jo phul nauha-KHwan the yunhi nauha-KHwan rahe