kab talak ruswa karega ai muqaddar so ja

kab talak rusvā karegā ai muqaddar so jā

paḌh chuke terā likhā ai mire ham-sar so jā

raat bhar dastakeñ darvāza-e-dil par paiham

kab talak ham ko satā.egā sitamgar so jā

vo nahīñ ā.eñge kab tak tū bhalā dhaḌkegā

ai mire dil mirī qismat ke sikandar so jā

ḳhūgar-e-ishq tū mad.hosh-e-mohabbat har-dam

ai mire qalb mire mast qalandar so jā

phir shab-e-hijr vahī dard kī yalġhār vahī

sabr aur shukr kī phir taan ke chādar so jā

kitne shab-ḳhūn kiye qāfile luuTe kitne

rahzanī kar lī bahut ab to ai rahbar so jā

shab kī tanhā.ī meñ sag-hā-e-tamannā mat chheḌ

shor-o-ġhul se bapā ho jā.egā mahshar so jā

bahr-e-ġham tujh ko kabhī ġharq nahīñ kar saktā

vus.at-e-zarf baḌhā pī ke samundar so jā

maazī kī dhund meñ mat jhāñk kahā maan mirā

raat bhar barseñge phir yaad ke patthar so jā

phir vahī rat-jage tā-sahar taḌapnā 'shāhid'

ishq meñ terā bahut haal hai abtar so jā

kab talak ruswa karega ai muqaddar so ja

paDh chuke tera likha ai mere ham-sar so ja

raat bhar dastaken darwaza-e-dil par paiham

kab talak hum ko sataega sitamgar so ja

wo nahin aaenge kab tak tu bhala dhaDkega

ai mere dil meri qismat ke sikandar so ja

KHugar-e-ishq tu madhosh-e-mohabbat har-dam

ai mere qalb mere mast qalandar so ja

phir shab-e-hijr wahi dard ki yalghaar wahi

sabr aur shukr ki phir tan ke chadar so ja

kitne shab-KHun kiye qafile luTe kitne

rahzani kar li bahut ab to ai rahbar so ja

shab ki tanhai mein sag-ha-e-tamanna mat chheD

shor-o-ghul se bapa ho jaega mahshar so ja

bahr-e-gham tujh ko kabhi gharq nahin kar sakta

wusat-e-zarf baDha pi ke samundar so ja

mazi ki dhund mein mat jhank kaha man mera

raat bhar barsenge phir yaad ke patthar so ja

phir wahi rat-jage ta-sahar taDapna 'shahid'

ishq mein tera bahut haal hai abtar so ja