kab tum bhaTke kyun tum bhaTke kis kis ko samjhaoge

kab tum bhaTke kyuuñ tum bhaTke kis kis ko samjhāoge

itnī duur to aa pahuñche ho aur kahāñ tak jāoge

is chālīs baras meñ tum ne kitne dost banā.e haiñ

ab jo umr bachī hai us meñ kitne dost banāoge

bachpan ke sab sañgī sāthī āḳhir kyuuñ tumheñ chhoḌ ga.e

koī yaar nayā pūchhe to is ko kyā batlāoge

jo bhī tum ne shohrat paa.ī jo bhī tum badnām hue

kyā yahī tarka apne pyāre bachchoñ ko de jāoge

ab is josh-e-ḳhud-āgāhī meñ aage kī kyā sochī hai

sher kahoge ishq karoge kyā kyā Dhoñg rachāoge

'ā.alī' kis ko fursat hogī ek tumhī ko rone kī

jaise sab yaad aa jaate haiñ tum bhī yaad aa jāoge

kab tum bhaTke kyun tum bhaTke kis kis ko samjhaoge

itni dur to aa pahunche ho aur kahan tak jaoge

is chaalis baras mein tum ne kitne dost banae hain

ab jo umr bachi hai us mein kitne dost banaoge

bachpan ke sab sangi sathi aaKHir kyun tumhein chhoD gae

koi yar naya puchhe to is ko kya batlaoge

jo bhi tum ne shohrat pai jo bhi tum badnam hue

kya yahi tarka apne pyare bachchon ko de jaoge

ab is josh-e-KHud-agahi mein aage ki kya sochi hai

sher kahoge ishq karoge kya kya Dhong rachaoge

'aali' kis ko fursat hogi ek tumhi ko rone ki

jaise sab yaad aa jate hain tum bhi yaad aa jaoge