kab wo tanhai ke aasar se ghabrae hain

kab vo tanhā.ī ke āsār se ghabrā.e haiñ

log to raunaq-e-bāzār se ghabrā.e haiñ

kaun kartā hai bhalā ābla-pā.ī kā gilā

ham to bas rastoñ kī raftār se ghabrā.e haiñ

apne qāmat se nikalnā paḌā bāhar un ko

jo shajar sāya-e-dīvār se ghabrā.e haiñ

log qīmat to lagā.eñge ye bāzār to hai

be-vaj.h ham to ḳharīdār se ghabrā.e haiñ

kis liye maañg rahe haiñ mirī dastār vo log

jo marī jur.at-e-guftār se ghabrā.e haiñ

ham ko aise nahīñ āvārgī sūjhī 'ehsān'

ham to apne dar-o-dīvār se ghabrā.e haiñ

kab wo tanhai ke aasar se ghabrae hain

log to raunaq-e-bazar se ghabrae hain

kaun karta hai bhala aabla-pai ka gila

hum to bas raston ki raftar se ghabrae hain

apne qamat se nikalna paDa bahar un ko

jo shajar saya-e-diwar se ghabrae hain

log qimat to lagaenge ye bazar to hai

be-wajh hum to KHaridar se ghabrae hain

kis liye mang rahe hain meri dastar wo log

jo mari jurat-e-guftar se ghabrae hain

hum ko aise nahin aawargi sujhi 'ehsan'

hum to apne dar-o-diwar se ghabrae hain