kab zamana sazgar-e-KHatir-e-na-saz tha

kab zamāna sāzgār-e-ḳhātir-e-nā-sāz thā

kis kā dam bharte hamārā dam hī jab dam-bāz thā

kyā batā.ūñ bazm kā un kī ajab andāz thā

āshnā-e-rāz bhī nā-āshnā-e-rāz thā

apne matlab kī har ik suntā thā bazm-e-dahr meñ

kis se kahte hāl-e-dil apnā koī hamrāz thā

ham hī ham the ham se thī duniyā-e-ishrat kī bahār

zindagī meñ vo bhī din guzre haiñ jin par naaz thā

vahshat-e-zauq-e-talab meñ jab uThe baḌhte ga.e

kis ko dāmān-e-junūn-e-shauq kā andāz thā

apnī hastī meñ ulajh kar dekhtā kyā ḳhud-pasand

zarre zarre meñ jahāñ ke zindagī kā raaz thā

be-piye bhī mai-kashoñ par be-ḳhudī chhā.ī rahī

ye nigāh-e-sāqī-e-badmast kā e.ajāz thā

vo bhī chup the dekh kar merā sukūt-e-ġham-navāz

merī ḳhāmoshī ke aalam meñ bhī koī raaz thā

kis ne duniyā ko banāyā kis kī duniyā ban ga.ī

yuuñ to kahne ke liye har ek duniyā-sāz thā

ham haiñ ab aur ulfat-e-sayyād asīrī kā lihāz

uḌ gayā yak-laḳht jo zor-e-par-e-parvāz thā

kal mohabbat kā nasha thā aur kaif-e-be-ḳhudī

ya.anī maiñ thā aur surūr-e-jalva-gāh-e-nāz thā

kab zamana sazgar-e-KHatir-e-na-saz tha

kis ka dam bharte hamara dam hi jab dam-baz tha

kya bataun bazm ka un ki ajab andaz tha

aashna-e-raaz bhi na-ashna-e-raaz tha

apne matlab ki har ek sunta tha bazm-e-dahr mein

kis se kahte haal-e-dil apna koi hamraaz tha

hum hi hum the hum se thi duniya-e-ishrat ki bahaar

zindagi mein wo bhi din guzre hain jin par naz tha

wahshat-e-zauq-e-talab mein jab uThe baDhte gae

kis ko daman-e-junun-e-shauq ka andaz tha

apni hasti mein ulajh kar dekhta kya KHud-pasand

zarre zarre mein jahan ke zindagi ka raaz tha

be-piye bhi mai-kashon par be-KHudi chhai rahi

ye nigah-e-saqi-e-badmast ka eajaz tha

wo bhi chup the dekh kar mera sukut-e-gham-nawaz

meri KHamoshi ke aalam mein bhi koi raaz tha

kis ne duniya ko banaya kis ki duniya ban gai

yun to kahne ke liye har ek duniya-saz tha

hum hain ab aur ulfat-e-sayyaad asiri ka lihaz

uD gaya yak-laKHt jo zor-e-par-e-parwaz tha

kal mohabbat ka nasha tha aur kaif-e-be-KHudi

yani main tha aur surur-e-jalwa-gah-e-naz tha