کب زمانہ سازگار خاطر ناساز تھا

کب زمانہ سازگار خاطر ناساز تھا

کس کا دم بھرتے ہمارا دم ہی جب دم باز تھا

کیا بتاؤں بزم کا ان کی عجب انداز تھا

آشنائے راز بھی نا آشنائے راز تھا

اپنے مطلب کی ہر اک سنتا تھا بزم دہر میں

کس سے کہتے حال دل اپنا کوئی ہم راز تھا

ہم ہی ہم تھے ہم سے تھی دنیائے عشرت کی بہار

زندگی میں وہ بھی دن گزرے ہیں جن پر ناز تھا

وحشت ذوق طلب میں جب اٹھے بڑھتے گئے

کس کو دامان جنون شوق کا انداز تھا

اپنی ہستی میں الجھ کر دیکھتا کیا خود پسند

ذرے ذرے میں جہاں کے زندگی کا راز تھا

بے پیے بھی میکشوں پر بے خودی چھائی رہی

یہ نگاہ ساقیٔ بدمست کا اعجاز تھا

وہ بھی چپ تھے دیکھ کر میرا سکوت غم نواز

میری خاموشی کے عالم میں بھی کوئی راز تھا

کس نے دنیا کو بنایا کس کی دنیا بن گئی

یوں تو کہنے کے لئے ہر ایک دنیا ساز تھا

ہم ہیں اب اور الفت صیاد اسیری کا لحاظ

اڑ گیا یک لخت جو زور پر پرواز تھا

کل محبت کا نشہ تھا اور کیف بے خودی

یعنی میں تھا اور سرور جلوہ گاہ ناز تھا