kab zulf-e-dota unki pareshan nahin hai

kab zulf-e-dotā un kī pareshān nahīñ hai

kab vahshat-e-dil kā mirī sāmān nahīñ hai

yādoñ ko lagā.e hue siine se guzar jā

ye rāh-e-mohabbat hai kuchh āsān nahīñ hai

duniyā meñ mujhe daulat-e-jāved hai hāsil

kyā dil meñ mire aap kā armān nahīñ hai

ai bāda-kasho zarf kī kuchh baat karo aaj

saaqī kā yahāñ aam ab ehsān nahīñ hai

kyā pūchhte ho tamkanat-e-husn kā aalam

ab jaise karam kā koī imkān nahīñ hai

kuchh roz se har neshtar-e-ġham hai gavārā

kyā ye nigah-e-mast kā ehsān nahīñ hai

armān umañg hausla ummīd bhī is meñ

kāshāna-e-dil dosto vīrān nahīñ hai

yuuñ milte haiñ mujh se vo sar-e-bazm 'jamālī'

jaise mirī un se koī pahchān nahīñ hai

kab zulf-e-dota un ki pareshan nahin hai

kab wahshat-e-dil ka meri saman nahin hai

yaadon ko lagae hue sine se guzar ja

ye rah-e-mohabbat hai kuchh aasan nahin hai

duniya mein mujhe daulat-e-jawed hai hasil

kya dil mein mere aap ka arman nahin hai

ai baada-kasho zarf ki kuchh baat karo aaj

saqi ka yahan aam ab ehsan nahin hai

kya puchhte ho tamkanat-e-husn ka aalam

ab jaise karam ka koi imkan nahin hai

kuchh roz se har neshtar-e-gham hai gawara

kya ye nigah-e-mast ka ehsan nahin hai

arman umang hausla ummid bhi is mein

kashana-e-dil dosto viran nahin hai

yun milte hain mujh se wo sar-e-bazm 'jamali'

jaise meri un se koi pahchan nahin hai