kabhi aabaad karta hai kabhi barbaad karta hai

kabhī ābād kartā hai kabhī barbād kartā hai

sitam har roz hī vo ik nayā ījād kartā hai

ham us kī har adā par roz par phailā.e aate haiñ

nazar ke jaal meñ pāband jo sayyād kartā hai

vo kal bhī mo'atabar thā aaj bhī rahbar hamārā hai

vo dushman jo vatan kī khokhlī buniyād kartā hai

usī ke ishq meñ jalnā mirī taqdīr Thahrī hai

mohabbat kī na.ī jo bastiyāñ ābād kartā hai

maiñ us ke pyaar ke dhāgoñ se apnī umr buntā huuñ

jo merā naam le le kar mujhe barbād kartā hai

tazād-e-ishq kā ye khel bhī kitnā anokhā hai

use ham bhuul jaate haiñ jo ham ko yaad kartā hai

zamāna ho gayā lekin ḳhabar lene nahīñ aayā

jo panchhī roz mere naam par āzād kartā hai

ajab vo shaḳhs hai us kī mohabbat bhī nirālī hai

jo pahle qaid kar ke ba.ad meñ āzād kartā hai

maiñ ik muddat se us ke pyaar kī ḳhushbū meñ jiitā huuñ

'hasan' misl-e-havā jo roz mujh ko shaad kartā hai

kabhi aabaad karta hai kabhi barbaad karta hai

sitam har roz hi wo ek naya ijad karta hai

hum us ki har ada par roz par phailae aate hain

nazar ke jal mein paband jo sayyaad karta hai

wo kal bhi mo'atabar tha aaj bhi rahbar hamara hai

wo dushman jo watan ki khokhli buniyaad karta hai

usi ke ishq mein jalna meri taqdir Thahri hai

mohabbat ki nai jo bastiyan aabaad karta hai

main us ke pyar ke dhagon se apni umr bunta hun

jo mera nam le le kar mujhe barbaad karta hai

tazad-e-ishq ka ye khel bhi kitna anokha hai

use hum bhul jate hain jo hum ko yaad karta hai

zamana ho gaya lekin KHabar lene nahin aaya

jo panchhi roz mere nam par aazad karta hai

ajab wo shaKHs hai us ki mohabbat bhi nirali hai

jo pahle qaid kar ke baad mein aazad karta hai

main ek muddat se us ke pyar ki KHushbu mein jita hun

'hasan' misl-e-hawa jo roz mujh ko shad karta hai