kabhi aahen kabhi nale kabhi aansu nikle

kabhī aaheñ kabhī naale kabhī aañsū nikle

un se āġhāz-e-suḳhan ke ka.ī pahlū nikle

yuuñ bhī vo bazm-e-tasavvur se guzar jaate haiñ

jaise lai saaz se yā phuul se ḳhushbū nikle

hai is ummīd pe saiqal hunar-e-tesha-zanī

sīna-e-sañg se shāyad koī gul-rū nikle

qissa-e-dār-o-rasan hī sahī kuchh baat karo

kisī unvāñ se to zikr-e-qad-o-gesū nikle

ġham-e-daurāñ ne kiyā ahl-e-tamannā kā vo haal

dasht se jaise hirāsāñ koī aahū nikle

ham jinheñ 'hosh' tajāhul se ḳhatā samjhe the

nāvak-e-nāz vo sab dil meñ tarāzū nikle

kabhi aahen kabhi nale kabhi aansu nikle

un se aaghaz-e-suKHan ke kai pahlu nikle

yun bhi wo bazm-e-tasawwur se guzar jate hain

jaise lai saz se ya phul se KHushbu nikle

hai is ummid pe saiqal hunar-e-tesha-zani

sina-e-sang se shayad koi gul-ru nikle

qissa-e-dar-o-rasan hi sahi kuchh baat karo

kisi unwan se to zikr-e-qad-o-gesu nikle

gham-e-dauran ne kiya ahl-e-tamanna ka wo haal

dasht se jaise hirasan koi aahu nikle

hum jinhen 'hosh' tajahul se KHata samjhe the

nawak-e-naz wo sab dil mein taraazu nikle