کبھی آہوں کبھی اشکوں کی پذیرائی ہے

کبھی آہوں کبھی اشکوں کی پذیرائی ہے

آپ کی بزم سے بہتر مری تنہائی ہے

جس سے ابھرا نہ کبھی ڈوبنے والا کوئی

تیری آنکھوں میں اسی جھیل کی گہرائی ہے

آج اک جان حیا پھول سے رخساروں پر

رنگ کشمیر کے سیبوں کا چرا لائی ہے

باغباں ہم نے لہو اپنا بہایا پہلے

تب کہیں جا کے گلستاں میں بہار آئی ہے

میری آغوش میں آتے ہی پگھل جاؤ گے

برف نے بھی کہیں شعلوں میں اماں پائی ہے

اس نے گھولا ہے فضاؤں میں ترنم شاید

گنگناتی ہوئی جو باد صبا آئی ہے

بحر جذبات میں طوفان مچل جاتے ہیں

تیری رفتار نے کیا شوخ ادا پائی ہے