kabhi andhera kabhi ujala suno ghazala

kabhī añdherā kabhī ujālā suno ġhazāla

koī kināya koī kināra suno ġhazāla

ham apne raste se haT ga.e haiñ bhaTak ga.e haiñ

na koī sahrā na koī dariyā suno ġhazāla

mire badan meñ dhaḌak rahā hai taḌap rahā hai

firāq lamhoñ kā dard saarā suno ġhazāla

badalte mausam ke rañg saare na tum hamāre

na ab ye sūraj na chāñd haala suno ġhazāla

na jī rahe haiñ na mar rahe haiñ sisak rahe haiñ

ujaaḌ āñkheñ ujaaḌ chehra suno ġhazāla

mirī nazar meñ chamak rahā hai damak rahā hai

jahāñ hai jugnū jidhar hai taarā suno ġhazāla

hamārī khiḌkī se duur haT ke zarā simaT ke

kahīñ charāġhāñ kahīñ saverā suno ġhazāla

tujhe to jaanā thā jā chukī ho mujhe yaqīñ hai

badal rahā huuñ maiñ ab Thikāna suno ġhazāla

na tum hamāre na ham tumhāre haiñ jhuuT saare

suno ġhazāla suno ġhazāla suno ġhazāla

ye kaisī ulfat kā khel ham ne hamesha khelā

na koī jiitā na koī haarā suno ġhazāla

mire safar meñ ye dhuup chhāñv na.ī nahīñ hai

vahīñ hai jañgal jahāñ hai rasta suno ġhazāla

kabhi andhera kabhi ujala suno ghazala

koi kinaya koi kinara suno ghazala

hum apne raste se haT gae hain bhaTak gae hain

na koi sahra na koi dariya suno ghazala

mere badan mein dhaDak raha hai taDap raha hai

firaq lamhon ka dard sara suno ghazala

badalte mausam ke rang sare na tum hamare

na ab ye suraj na chand haala suno ghazala

na ji rahe hain na mar rahe hain sisak rahe hain

ujaD aankhen ujaD chehra suno ghazala

meri nazar mein chamak raha hai damak raha hai

jahan hai jugnu jidhar hai tara suno ghazala

hamari khiDki se dur haT ke zara simaT ke

kahin charaghan kahin sawera suno ghazala

tujhe to jaana tha ja chuki ho mujhe yaqin hai

badal raha hun main ab Thikana suno ghazala

na tum hamare na hum tumhaare hain jhuT sare

suno ghazala suno ghazala suno ghazala

ye kaisi ulfat ka khel hum ne hamesha khela

na koi jita na koi haara suno ghazala

mere safar mein ye dhup chhanw nai nahin hai

wahin hai jangal jahan hai rasta suno ghazala