کبھی بدن کبھی چہرہ نظر نہیں آتا

کبھی بدن کبھی چہرہ نظر نہیں آتا

مگر وہ شخص ادھورا نظر نہیں آتا

بھٹک رہے ہیں اندھیرے میں قافلے والے

افق پہ کوئی ستارہ نظر نہیں آتا

شدید حبس میں جاتا ہوں اس طرف پھر بھی

کھلا ہوا وہ دریچہ نظر نہیں آتا

جو ہو رہا ہے گریباں میں دیکھ لیتا ہوں

اس آئنے میں بھلا کیا نظر نہیں آتا

جو گفتگو میں ترا تذکرہ نہ کرتا ہو

وہ آدمی مجھے اپنا نظر نہیں آتا

شعورؔ خوف جھٹک کر جلوس میں آ جاؤ

سروں کی بھیڑ میں چہرہ نظر نہیں آتا