kabhi bahaaron ke mausamon mein jo dil ki basti ghazal-sara thi

kabhī bahāroñ ke mausamoñ meñ jo dil kī bastī ġhazal-sarā thī

vahīñ kahīñ ek aarzū ke machalne kī bhī baḌī kathā thī

jalā ke jab saarī kashtiyāñ maiñ samundaroñ kī banī ġhizā thī

usī ghaḌī to jabīn-e-shab par likhī ga.ī merī bhī duā thī

binā sahāroñ ke ziist mushkil guzār aa.e to phir ye jaanā

ki maiñ hī apne hasīñ chaman kā zamīn-e-nam thī shajar ghanā thī

mohabbateñ bhī rifāqateñ bhī adāvateñ aur nadāmateñ bhī

mirā asāsa maiñ jāntī thī kahāñ vafā thī kahāñ jafā thī

virāsatoñ kī kitāb kholī to naam merā kahīñ nahīñ thā

maiñ chup thī sochā ki is meñ shāyad mire qabīle kī bhī razā thī

jalegā dil to dhuāñ uThegā ye aag aise nahīñ bujhegī

nagar nagar ye ḳhabar pahuñchtī magar havā kī ajab dishā thī

bahut pukārā thā manziloñ ne 'hinā' mujhe un hī rāstoñ se

magar musalsal safar thā merā kahīñ na rukne meñ hī baqā thī

kabhi bahaaron ke mausamon mein jo dil ki basti ghazal-sara thi

wahin kahin ek aarzu ke machalne ki bhi baDi katha thi

jala ke jab sari kashtiyan main samundaron ki bani ghiza thi

usi ghaDi to jabin-e-shab par likhi gai meri bhi dua thi

bina sahaaron ke zist mushkil guzar aae to phir ye jaana

ki main hi apne hasin chaman ka zamin-e-nam thi shajar ghana thi

mohabbaten bhi rifaqaten bhi adawaten aur nadamaten bhi

mera asasa main jaanti thi kahan wafa thi kahan jafa thi

wirasaton ki kitab kholi to nam mera kahin nahin tha

main chup thi socha ki is mein shayad mere qabile ki bhi raza thi

jalega dil to dhuan uThega ye aag aise nahin bujhegi

nagar nagar ye KHabar pahunchti magar hawa ki ajab disha thi

bahut pukara tha manzilon ne 'hina' mujhe un hi raston se

magar musalsal safar tha mera kahin na rukne mein hi baqa thi