kabhi bhulaya nahin yaad bhi kiya nahin hai

kabhī bhulāyā nahīñ yaad bhī kiyā nahīñ hai

ye kaisā jurm hai jis meñ koī sazā nahīñ hai

maiñ baat baat pe rone kā mājrā pūchhūñ

vo hañs rahā hai batāne ko kuchh rahā nahīñ hai

zamīñ pe āh-o-bukā aur ḳhūn-e-nāhaq bhī

zabān-e-ḳhalq ye pūchhe hai kyā ḳhudā nahīñ hai

kalām karne ko nāseh rahā na vaa.iz hai

maiñ kyā kahūñ ki mire paas bad-duā nahīñ hai

bas ab to aañkh meñ sahrā hī jam gayā aa ke

samajh lo ḳhvāb bhī dahlīz pe rakhā nahīñ hai

qadam qadam pe vahī tilmilātī ḳhvāhish hai

payām laane ko koī bhī dilrubā nahīñ hai

mirī udāsī mire kaam aa sakī na kabhī

bas ab savāl bhī karne kā hausla nahīñ hai

raqīb-e-ḳhvāhish-e-maujūda sun liyā tū ne

chaman bahut haiñ magar koī dekhtā nahīñ hai

kabhi bhulaya nahin yaad bhi kiya nahin hai

ye kaisa jurm hai jis mein koi saza nahin hai

main baat baat pe rone ka majra puchhun

wo hans raha hai batane ko kuchh raha nahin hai

zamin pe aah-o-buka aur KHun-e-nahaq bhi

zaban-e-KHalq ye puchhe hai kya KHuda nahin hai

kalam karne ko naseh raha na waiz hai

main kya kahun ki mere pas bad-dua nahin hai

bas ab to aankh mein sahra hi jam gaya aa ke

samajh lo KHwab bhi dahliz pe rakha nahin hai

qadam qadam pe wahi tilmilati KHwahish hai

payam lane ko koi bhi dilruba nahin hai

meri udasi mere kaam aa saki na kabhi

bas ab sawal bhi karne ka hausla nahin hai

raqib-e-KHwahish-e-maujuda sun liya tu ne

chaman bahut hain magar koi dekhta nahin hai