kabhi dastan-e-hasti ye tamam tak na pahunche

kabhī dāstān-e-hastī ye tamām tak na pahuñche

na fanā se āshnā ho to davām tak na pahuñche

tū pilā mujhe nazar se ki ye jaam tak na pahuñche

kahīñ bāda-e-mohabbat sar-e-ām tak na pahuñche

tū sitam kī qaiñchiyoñ se par-e-ārzū jo kaaTe

koī tā.ir-e-taḳhayyul tire baam tak na pahuñche

mirā vaqt-e-vāpsī hai tū na aa mire sirhāne

ki jafā kī koī tohmat tire naam tak na pahuñche

jo sanam-kade meñ jalva tirā dekh le barahman

tirā naam chhoḌ kar vo kabhī raam tak na pahuñche

tirī ek yaad rangīñ mirī ziist kā sahārā

jo vo sub.h ko na aa.e to ye shaam tak na pahuñche

mirā āḳhirī thā sajda ki nafas ne saath chhoḌā

tire dar pe sar jhukāyā to qiyām tak na pahuñche

mirā kārvān-e-hastī mire sabr hī ne luuTā

kabhī aah bhī jo khīñchī tire naam tak na pahoñche

ġham-e-ishq gar na ho to na ho dil asīr-e-gesū

ki na ho jo daana taa.ir kabhī daam tak na pahuñche

maiñ jhukā huuñ bandagī ko to vo ruḳh phirā rahe haiñ

ki salām rafta rafta ye payām tak na pahuñche

jo naqāb-e-ruḳh ulaT kar kabhī sāmne bhī aaya

jo chaḌhā.e tevaroñ ko ki salām tak na pahuñche

jo pilā de muskurā kar tū jhukī jhukī nazar se

koī haath mai-kade meñ kabhī jaam tak na pahuñche

kabhi dastan-e-hasti ye tamam tak na pahunche

na fana se aashna ho to dawam tak na pahunche

tu pila mujhe nazar se ki ye jam tak na pahunche

kahin baada-e-mohabbat sar-e-am tak na pahunche

tu sitam ki qainchiyon se par-e-arzu jo kaTe

koi tair-e-taKHayyul tere baam tak na pahunche

mera waqt-e-wapsi hai tu na aa mere sirhane

ki jafa ki koi tohmat tere nam tak na pahunche

jo sanam-kade mein jalwa tera dekh le barahman

tera nam chhoD kar wo kabhi ram tak na pahunche

teri ek yaad rangin meri zist ka sahaara

jo wo subh ko na aae to ye sham tak na pahunche

mera aaKHiri tha sajda ki nafas ne sath chhoDa

tere dar pe sar jhukaya to qiyam tak na pahunche

mera karwan-e-hasti mere sabr hi ne luTa

kabhi aah bhi jo khinchi tere nam tak na pahonche

gham-e-ishq gar na ho to na ho dil asir-e-gesu

ki na ho jo dana tair kabhi dam tak na pahunche

main jhuka hun bandagi ko to wo ruKH phira rahe hain

ki salam rafta rafta ye payam tak na pahunche

jo naqab-e-ruKH ulaT kar kabhi samne bhi aaya

jo chaDhae tewaron ko ki salam tak na pahunche

jo pila de muskura kar tu jhuki jhuki nazar se

koi hath mai-kade mein kabhi jam tak na pahunche