kabhi dekhen jo ru-e-yar daraKHt

kabhī dekheñ jo rū-e-yār daraḳht

apne phūloñ ko samjheñ ḳhaar daraḳht

chār-sū hai inheñ kā likh piiḌā

ye anāsir ke haiñ jo chaar daraḳht

mere gulzār meñ haiñ sho.ale phuul

mere har aah sho.ala-bār daraḳht

sau fasād ek ishq meñ uTThe

boyā ik tuḳhm uge hazār daraḳht

jab chalā baaġh se vo sarv-e-ravāñ

ho ga.e tā.eroñ ko daar daraḳht

jis ko tuubā zamāna kahtā hai

tere ghar meñ hai sāya-dār daraḳht

tū ḳhizāñ meñ jo sair ko nikle

mire ho jaa.eñ be-bahār daraḳht

phal na laayā nihāl-e-ishq apnā

phale-phūle hazār baar daraḳht

'bahr' kyā nashshe meñ ḳhush aate haiñ

nahr-e-gulshan ke daar paar daraḳht

kabhi dekhen jo ru-e-yar daraKHt

apne phulon ko samjhen KHar daraKHt

chaar-su hai inhen ka likh piDa

ye anasir ke hain jo chaar daraKHt

mere gulzar mein hain shoale phul

mere har aah shoala-bar daraKHt

sau fasad ek ishq mein uTThe

boya ek tuKHm uge hazar daraKHt

jab chala bagh se wo sarw-e-rawan

ho gae taeron ko dar daraKHt

jis ko tuba zamana kahta hai

tere ghar mein hai saya-dar daraKHt

tu KHizan mein jo sair ko nikle

mere ho jaen be-bahaar daraKHt

phal na laya nihaal-e-ishq apna

phale-phule hazar bar daraKHt

'bahr' kya nashshe mein KHush aate hain

nahr-e-gulshan ke dar par daraKHt