kabhi Dhalte hue suraj ka manzar hi nahin dekha

kabhī Dhalte hue sūraj kā manzar hī nahīñ dekhā

tire dil se pare maiñ ne guzar kar hī nahīñ dekhā

batā.ūñ kyā guzartī hai mire bachchoñ ke zehnoñ par

huī muddat talāsh-e-rizq meñ ghar hī nahīñ dekhā

maiñ ā.īna sadā rakhtā huuñ mustaqbil ke manzar kā

kabhī maazī kī jānib maiñ ne muḌ kar hī nahīñ dekhā

na sāhil par na kashtī par koī tohmat rakhī maiñ ne

thā Dar dil meñ talātum kā samundar hī nahīñ dekhā

kamī shāyad hai qismat kī ki āñkhoñ ne mirī ab tak

jise almās kahte haiñ vo patthar hī nahīñ dekhā

kabhi Dhalte hue suraj ka manzar hi nahin dekha

tere dil se pare main ne guzar kar hi nahin dekha

bataun kya guzarti hai mere bachchon ke zehnon par

hui muddat talash-e-rizq mein ghar hi nahin dekha

main aaina sada rakhta hun mustaqbil ke manzar ka

kabhi mazi ki jaanib main ne muD kar hi nahin dekha

na sahil par na kashti par koi tohmat rakhi main ne

tha Dar dil mein talatum ka samundar hi nahin dekha

kami shayad hai qismat ki ki aankhon ne meri ab tak

jise almas kahte hain wo patthar hi nahin dekha