kabhi dil ko haar ke roz-o-shab gham-e-ishq mein jo ghula karun

kabhī dil ko haar ke roz-o-shab ġham-e-ishq meñ jo ghulā karūñ

mirā dil hai kyā koī saltanat jo ḳhirāj is kā adā karūñ

maiñ misāl-e-kirmak-e-shab banūñ jo jalūñ to nuur atā karūñ

ġham-e-zāt kā maiñ amiiñ nahīñ lav-e-sham.a par jo jalā karūñ

kabhī har usuul ko toḌ duuñ kabhī qatl apnī anā karūñ

ye ḳhilāf-e-adl hai is tarah maiñ mudām tujh se milā karūñ

tū asiir hai ġham-e-zāt kā milā faiz tujh se kabhī kabhī

maiñ rahīn-e-mausam-e-gul nahīñ jo bahār hī meñ khilā karūñ

tire qurb kī ye sa.ādateñ tirī ham-nashīnī kī lazzateñ

yahī aarzū hai qadam qadam tire naqsh par maiñ chalā karūñ

mirī zaat hai mirā imtihāñ mirā huzn merā shu.ūr hai

maiñ anā ke batn meñ qaid huuñ maiñ karūñ to kis kā gila karūñ

ye qusūr-e-nāla-e-shab nahīñ ki duā rahī mirī be-asar

ye pasand hai tujhe is qadar ki maiñ roz tujh se duā karūñ

mire kāsa-hā-e-gunāh jab tirī rahmatoñ se qarīb haiñ

maiñ batā na pā.ūñgā hāl-e-dil jo maiñ aaj tujh se hayā karūñ

jo tirā karam thā ajiib thā mire dil kā haal ajīb-tar

ye ḳhayāl kyoñ mire dil meñ phir tū karam kare maiñ ḳhatā karūñ

kabhi dil ko haar ke roz-o-shab gham-e-ishq mein jo ghula karun

mera dil hai kya koi saltanat jo KHiraj is ka ada karun

main misal-e-kirmak-e-shab banun jo jalun to nur ata karun

gham-e-zat ka main amin nahin law-e-shama par jo jala karun

kabhi har usul ko toD dun kabhi qatl apni ana karun

ye KHilaf-e-adl hai is tarah main mudam tujh se mila karun

tu asir hai gham-e-zat ka mila faiz tujh se kabhi kabhi

main rahin-e-mausam-e-gul nahin jo bahaar hi mein khila karun

tere qurb ki ye saadaten teri ham-nashini ki lazzaten

yahi aarzu hai qadam qadam tere naqsh par main chala karun

meri zat hai mera imtihan mera huzn mera shuur hai

main ana ke batn mein qaid hun main karun to kis ka gila karun

ye qusur-e-nala-e-shab nahin ki dua rahi meri be-asar

ye pasand hai tujhe is qadar ki main roz tujh se dua karun

mere kasa-ha-e-gunah jab teri rahmaton se qarib hain

main bata na paunga haal-e-dil jo main aaj tujh se haya karun

jo tera karam tha ajib tha mere dil ka haal ajib-tar

ye KHayal kyon mere dil mein phir tu karam kare main KHata karun