kabhi do ghunT pi kar jab tabiat ko surur aaya

kabhī do ghūñT pī kar jab tabī.at ko surūr aaya

to kuchh kuchh zindagī kā bāda-noshoñ ko shu.ūr aaya

likhīñ jab kātib-e-taqdīr ne bandoñ kī taqdīreñ

mire hisse meñ ijz aur un ke hisse meñ ġhurūr aaya

agar hindū musalmāñ ḳhālisan insān haiñ saare

to kyoñ tafrīq kā hai un kī aqloñ meñ futūr aaya

mohabbat meñ shikāyat lab pe lā.ūñ merī kyā jur.at

achānak aañkh bhar aa.ī jo maiñ tere huzūr aaya

ḳhudā ma.alūm us ko kis liye raġhbat huī ham se

ki jab bhī mai-kashī kī shaiḳh samjhāne zarūr aaya

umīdeñ ho chukī thiiñ ḳhatm yaksar zindagānī kī

tum aa.e to marīz-e-ishq ke chehre pe nuur aaya

'naresh' aqsā-e-ālam jagmagā uTThe nigāhoñ meñ

tasavvur meñ mire jis dam mirā vo rashk-e-hūr aaya

kabhi do ghunT pi kar jab tabiat ko surur aaya

to kuchh kuchh zindagi ka baada-noshon ko shuur aaya

likhin jab katib-e-taqdir ne bandon ki taqdiren

mere hisse mein ijz aur un ke hisse mein ghurur aaya

agar hindu musalman KHalisan insan hain sare

to kyon tafriq ka hai un ki aqlon mein futur aaya

mohabbat mein shikayat lab pe laun meri kya jurat

achanak aankh bhar aai jo main tere huzur aaya

KHuda malum us ko kis liye raghbat hui hum se

ki jab bhi mai-kashi ki shaiKH samjhane zarur aaya

umiden ho chuki thin KHatm yaksar zindagani ki

tum aae to mariz-e-ishq ke chehre pe nur aaya

'naresh' aqsa-e-alam jagmaga uTThe nigahon mein

tasawwur mein mere jis dam mera wo rashk-e-hur aaya