kabhi ghamgin hota hun kabhi main muskuraata hun

kabhī ġhamgīn hotā huuñ kabhī maiñ muskurātā huuñ

tumheñ jab yaad kartā huuñ to ḳhud ko bhuul jaatā huuñ

tumheñ to dushmanoñ kī dushmanī ne maar Daalā hai

mujhe dekho maiñ apne dostoñ se zaḳhm khātā huuñ

kabhī fursat mile to dekh lenā ik nazar aa kar

tumhārī yaad meñ bujhtī huī sham.eñ jalātā huuñ

maiñ chaltā jā rahā huuñ ābla-pā shauq-e-manzil meñ

kabhī kuī sher kahtā huuñ kabhī kuchh gungunātā huuñ

'ḳhalīl' ab merī āñkhoñ meñ sunahre ḳhvāb mat bonā

maiñ pahle hī dukhoñ kī khetiyāñ tanhā ugātā huuñ

kabhi ghamgin hota hun kabhi main muskuraata hun

tumhein jab yaad karta hun to KHud ko bhul jata hun

tumhein to dushmanon ki dushmani ne mar Dala hai

mujhe dekho main apne doston se zaKHm khata hun

kabhi fursat mile to dekh lena ek nazar aa kar

tumhaari yaad mein bujhti hui shamen jalata hun

main chalta ja raha hun aabla-pa shauq-e-manzil mein

kabhi kui sher kahta hun kabhi kuchh gungunata hun

'KHalil' ab meri aankhon mein sunahre KHwab mat bona

main pahle hi dukhon ki khetiyan tanha ugata hun