kabhi giryan kabhi KHandan kabhi hairan hun main

kabhī giryāñ kabhī ḳhandāñ kabhī hairāñ huuñ maiñ

muḳhtasar hai mirī rūdād ki insāñ huuñ maiñ

sehn-e-gulshan se mirī ḳhāk-e-nasheman na uḌā

ai sabā mahram-e-asrār-e-gulistāñ huuñ maiñ

yuuñ mujhe dil se farāmosh kiye baiThe haiñ

jaise un kā hī koī ḳhvāb-e-pareshāñ huuñ maiñ

de ke ġham aap ne takmīl-e-junūñ bhī to na kī

sochiye kab se yuuñ hī chāk-e-garebāñ huuñ maiñ

bazm-e-kaunain meñ ab tak mah-o-ḳhurshīd sahī

un kī mahfil meñ charāġh-e-tah-e-dāmāñ huuñ maiñ

dil ko ummīd-e-karam rakhtī hai muztar ya.anī

ye bhī ik husn-e-talab hai ki pareshāñ huuñ maiñ

mujh ko sharminda na kar mujh se ik aañsū bhī na maañg

ai ġham-e-dost bahut be-sar-o-sāmāñ huuñ maiñ

ye mirā haal hai naala bhī nahīñ kar saktā

aur mirā zarf bhī dekho ki ġhazal-ḳhvāñ huuñ maiñ

'kaif' is haal meñ haiñ āj-kal insāñ ki mujhe

sharm aatī hai ye kahte hue insāñ huuñ maiñ

kabhi giryan kabhi KHandan kabhi hairan hun main

muKHtasar hai meri rudad ki insan hun main

sehn-e-gulshan se meri KHak-e-nasheman na uDa

ai saba mahram-e-asrar-e-gulistan hun main

yun mujhe dil se faramosh kiye baiThe hain

jaise un ka hi koi KHwab-e-pareshan hun main

de ke gham aap ne takmil-e-junun bhi to na ki

sochiye kab se yun hi chaak-e-gareban hun main

bazm-e-kaunain mein ab tak mah-o-KHurshid sahi

un ki mahfil mein charagh-e-tah-e-daman hun main

dil ko ummid-e-karam rakhti hai muztar yani

ye bhi ek husn-e-talab hai ki pareshan hun main

mujh ko sharminda na kar mujh se ek aansu bhi na mang

ai gham-e-dost bahut be-sar-o-saman hun main

ye mera haal hai nala bhi nahin kar sakta

aur mera zarf bhi dekho ki ghazal-KHwan hun main

'kaif' is haal mein hain aaj-kal insan ki mujhe

sharm aati hai ye kahte hue insan hun main