kabhi hum par bhi wo but mehrban ho jae na-mumkin

kabhī ham par bhī vo but mehrbāñ ho jaa.e nā-mumkin

mohabbat bhī jahāñ meñ kāmrāñ ho jaa.e nā-mumkin

kuchh is Dhab se nizām-e-gulsitāñ ho jaa.e nā-mumkin

bahār aa.e kabhī daur-e-ḳhizāñ ho jaa.e nā-mumkin

mazā jab hai ki ham ko qābil-e-mashq-e-sitam samjhe

magar itnā bhī vo but mehrbāñ ho jaa.e nā-mumkin

samajh kar dost dushman ko lagā lete haiñ siine se

hameñ apnoñ pe ġhairoñ kā gumāñ ho jaa.e nā-mumkin

mirī har iltijā par vo nahīñ kah dete haiñ fauran

kabhī ik baar bhūle se bhī haañ ho jaa.e nā-mumkin

mohabbat ke asar kā kis tarah mujh ko yaqīñ aa.e

yahāñ jo dil kī hālat hai vahāñ ho jaa.e nā-mumkin

kuchh is had tak har ik bande ko da.avā hai ḳhudā.ī kā

ki ab bande pe bande kā gumāñ ho jaa.e nā-mumkin

tujhe ai nāḳhudā hargiz ḳhudā ham kah nahīñ sakte

kabhī qatra bhī bahr-e-bekarāñ ho jaa.e nā-mumkin

mirī manzil vo manzil hai kabhī jo mil nahīñ saktī

sarāb-e-dasht bhī āb-e-ravāñ ho jaa.e nā-mumkin

mazā jab hai qafas bhī āshiyāñ ke saath jal uTThe

kabhī yuuñ mehrbāñ barq-e-tapāñ ho jaa.e nā-mumkin

ḳhamoshī hī bayāñ kar de to kar de ain mumkin hai

zabāñ se hāl-e-dil apnā bayāñ ho jaa.e nā-mumkin

kabhī bhī dil jale ko kaun roke āh-o-nāla se

alag ai 'sehr' ātish se dhuāñ ho jaa.e nā-mumkin

kabhi hum par bhi wo but mehrban ho jae na-mumkin

mohabbat bhi jahan mein kaamran ho jae na-mumkin

kuchh is Dhab se nizam-e-gulsitan ho jae na-mumkin

bahaar aae kabhi daur-e-KHizan ho jae na-mumkin

maza jab hai ki hum ko qabil-e-mashq-e-sitam samjhe

magar itna bhi wo but mehrban ho jae na-mumkin

samajh kar dost dushman ko laga lete hain sine se

hamein apnon pe ghairon ka guman ho jae na-mumkin

meri har iltija par wo nahin kah dete hain fauran

kabhi ek bar bhule se bhi han ho jae na-mumkin

mohabbat ke asar ka kis tarah mujh ko yaqin aae

yahan jo dil ki haalat hai wahan ho jae na-mumkin

kuchh is had tak har ek bande ko dawa hai KHudai ka

ki ab bande pe bande ka guman ho jae na-mumkin

tujhe ai naKHuda hargiz KHuda hum kah nahin sakte

kabhi qatra bhi bahr-e-bekaran ho jae na-mumkin

meri manzil wo manzil hai kabhi jo mil nahin sakti

sarab-e-dasht bhi aab-e-rawan ho jae na-mumkin

maza jab hai qafas bhi aashiyan ke sath jal uTThe

kabhi yun mehrban barq-e-tapan ho jae na-mumkin

KHamoshi hi bayan kar de to kar de ain mumkin hai

zaban se haal-e-dil apna bayan ho jae na-mumkin

kabhi bhi dil jale ko kaun roke aah-o-nala se

alag ai 'sehr' aatish se dhuan ho jae na-mumkin