kabhi hawa kabhi bijli ke ham-rikab hua

kabhī havā kabhī bijlī ke ham-rikāb huā

phir is ke ba.ad maiñ jiine meñ kāmyāb huā

nazar-navāz nazāre the mere chāroñ taraf

khulī jo aañkh to barham vo saarā ḳhvāb huā

kabhī jo bā.is-e-rāhat thā ahl-e-dil ke liye

ye kyā huā ki vo manzar bhī ab azaab huā

vo al-atash kī sadā.eñ vo karb-e-tishna-labī

furāt jis ke tasavvur se aab aab huā

hamārī chīḳh fazāoñ meñ kho ga.ī ya.anī

khulā darīcha koī vā na koī baab huā

hamāre qatl kī sāzish meñ thā sharīk to kyā

ḳhatā muaaf karam us kā be-hisāb huā

anā pasand tabī.at kī sarfarāzī dekh

ki 'nāz' ḳhaak meñ mil kar bhī āftāb huā

kabhi hawa kabhi bijli ke ham-rikab hua

phir is ke baad main jine mein kaamyab hua

nazar-nawaz nazare the mere chaaron taraf

khuli jo aankh to barham wo sara KHwab hua

kabhi jo bais-e-rahat tha ahl-e-dil ke liye

ye kya hua ki wo manzar bhi ab azab hua

wo al-atash ki sadaen wo karb-e-tishna-labi

furaat jis ke tasawwur se aab aab hua

hamari chiKH fazaon mein kho gai yani

khula daricha koi wa na koi bab hua

hamare qatl ki sazish mein tha sharik to kya

KHata muaf karam us ka be-hisab hua

ana pasand tabiat ki sarfaraazi dekh

ki 'naz' KHak mein mil kar bhi aaftab hua