kabhi honTon pe aisa lams apni aankh khole

kabhī hoñToñ pe aisā lams apnī aañkh khole

ki bosā ḳhud-kushī karne se pahle muskurā de

koī aañsū chamakne meñ hamārā saath detā

to zohra aur atārid apne ghar kī raah lete

lajā kar raat ne kuchh aur bhī ghūñghaT nikālā

talab ne jism pahnā shauq ne gahne utāre

tasavvur meñ Tahalte ḳhāl-o-ḳhad kyā chāhte haiñ

udāsī se kaho tasvīr kī āñkhoñ se pūchhe

dukāñ ik sāmne aisī achānak aa ga.ī thī

jahāñ mumkin na thā ham apnī jeboñ meñ samāte

bhikāran jaate jaate pīchhe muḌ kar dekh le to

maiñ us ke naam kar duuñ dil ke maftūha 'ilāqe

utar ātīñ tire jhīloñ pe sustāne ko Dāreñ

to us din ham bhī apne ġhaar se bāhar nikalte

kabhi honTon pe aisa lams apni aankh khole

ki bosa KHud-kushi karne se pahle muskura de

koi aansu chamakne mein hamara sath deta

to zohra aur atarid apne ghar ki rah lete

laja kar raat ne kuchh aur bhi ghunghaT nikala

talab ne jism pahna shauq ne gahne utare

tasawwur mein Tahalte KHal-o-KHad kya chahte hain

udasi se kaho taswir ki aankhon se puchhe

dukan ek samne aisi achanak aa gai thi

jahan mumkin na tha hum apni jebon mein samate

bhikaran jate jate pichhe muD kar dekh le to

main us ke nam kar dun dil ke maftuha 'ilaqe

utar aatin tere jhilon pe sustane ko Daren

to us din hum bhi apne ghaar se bahar nikalte