kabhi hudud se bahar kabhi wo had mein raha

kabhī hudūd se bāhar kabhī vo had meñ rahā

mirā yaqīn hamesha gumāñ kī zad meñ rahā

hai bahr-o-bar meñ ravāñ haal merā sayyāra

gahe vo burj-e-samak meñ gahe asad meñ rahā

usī ke dam se rahī zindagī kī rañgīnī

junūñ kā kaif jo paimānā-e-ḳhirad meñ rahā

use nasīb kahāñ lazzat-e-sabīl-e-safar

vo kārvāñ jo nigahbānī-e-rasad meñ rahā

use kahāñ se milegī tire makāñ meñ amaañ

tamām-umr jau paikār-e-nek-o-bad meñ rahā

'razā' jo guzrā to kuchh raushnī bhī chhoḌ gayā

vo ik sharar thā jo andesha-e-abad meñ rahā

kabhi hudud se bahar kabhi wo had mein raha

mera yaqin hamesha guman ki zad mein raha

hai bahr-o-bar mein rawan haal mera sayyara

gahe wo burj-e-samak mein gahe asad mein raha

usi ke dam se rahi zindagi ki rangini

junun ka kaif jo paimana-e-KHirad mein raha

use nasib kahan lazzat-e-sabil-e-safar

wo karwan jo nigahbani-e-rasad mein raha

use kahan se milegi tere makan mein aman

tamam-umr jau paikar-e-nek-o-bad mein raha

'raza' jo guzra to kuchh raushni bhi chhoD gaya

wo ek sharar tha jo andesha-e-abad mein raha