kabhi inkar hota hai kabhi iqrar hota hai

kabhī inkār hotā hai kabhī iqrār hotā hai

yahī haiñ ishq kī rasmeñ yahī to pyaar hotā hai

tere aane kī bāteñ dil ke bahlāne kī bāteñ haiñ

baḌī mushkil se qismat meñ visāl-e-yār hotā hai

ye nāzuk chiiz hai dil aap is se khel na kheleñ

diloñ ke khel puure khelnā dushvār hotā hai

bahut mushkil hai manzil tak pahuñch paanā mohabbat meñ

ki rāh-e-ishq par to har koī lāchār hotā hai

sar-e-mū be-ruḳhī se bhī na mere dil ko tum chheḌo

baḌā nāzuk rabāb-e-dil kā har ik taar hotā hai

kiye baiThe rahe sar ḳham ki us zālim kī mahfil meñ

nigāhoñ ko uThā saknā bahut dushvār hotā hai

karo armān itne hī ki jo 'nirdosh' puure hoñ

na puurī ho agar ḳhvāhish to dil bezār hotā hai

kabhi inkar hota hai kabhi iqrar hota hai

yahi hain ishq ki rasmen yahi to pyar hota hai

tere aane ki baaten dil ke bahlane ki baaten hain

baDi mushkil se qismat mein visal-e-yar hota hai

ye nazuk chiz hai dil aap is se khel na khelen

dilon ke khel pure khelna dushwar hota hai

bahut mushkil hai manzil tak pahunch pana mohabbat mein

ki rah-e-ishq par to har koi lachaar hota hai

sar-e-mu be-ruKHi se bhi na mere dil ko tum chheDo

baDa nazuk rabab-e-dil ka har ek tar hota hai

kiye baiThe rahe sar KHam ki us zalim ki mahfil mein

nigahon ko uTha sakna bahut dushwar hota hai

karo arman itne hi ki jo 'nirdosh' pure hon

na puri ho agar KHwahish to dil bezar hota hai