kabhi is makan se guzar gaya kabhi us makan se guzar gaya

kabhī is makāñ se guzar gayā kabhī us makāñ se guzar gayā

tire āstāñ kī talāsh meñ maiñ har āstāñ se guzar gayā

kabhī mehr-o-māh-o-nujūm se kabhī kahkashāñ se guzar gayā

jo tere ḳhayāl meñ chal paḌā vo kahāñ kahāñ se guzar gayā

abhī aadmī hai fazāoñ meñ abhī uḌ rahā hai ḳhalāoñ meñ

ye na jaane pahuñchegā kis jagah agar āsmāñ se guzar gayā

ye mirā kamāl-e-gunah sahī magar is ko dekh mire ḳhudā

mujhe tū ne rokā jahāñ jahāñ maiñ vahāñ vahāñ se guzar gayā

jise log kahte haiñ zindagī vo to hādsoñ kā hujūm hai

vo to kahiye merā hī kaam thā ki maiñ darmiyāñ se guzar gayā

maiñ murād-e-shauq ko pā ke bhī na murād-e-shauq ko pā sakūñ

dar-e-mehrbāñ pe pahuñch ke bhī dar-e-mehrbāñ se guzar gayā

chalo 'arsh' mahfil-e-dost meñ ki payām-e-dost bhī hai yahī

vo jo hādisa thā firāq kā sar-e-dushmanāñ se guzar gayā

kabhi is makan se guzar gaya kabhi us makan se guzar gaya

tere aastan ki talash mein main har aastan se guzar gaya

kabhi mehr-o-mah-o-nujum se kabhi kahkashan se guzar gaya

jo tere KHayal mein chal paDa wo kahan kahan se guzar gaya

abhi aadmi hai fazaon mein abhi uD raha hai KHalaon mein

ye na jaane pahunchega kis jagah agar aasman se guzar gaya

ye mera kamal-e-gunah sahi magar is ko dekh mere KHuda

mujhe tu ne roka jahan jahan main wahan wahan se guzar gaya

jise log kahte hain zindagi wo to hadson ka hujum hai

wo to kahiye mera hi kaam tha ki main darmiyan se guzar gaya

main murad-e-shauq ko pa ke bhi na murad-e-shauq ko pa sakun

dar-e-mehrban pe pahunch ke bhi dar-e-mehrban se guzar gaya

chalo 'arsh' mahfil-e-dost mein ki payam-e-dost bhi hai yahi

wo jo hadisa tha firaq ka sar-e-dushmanan se guzar gaya