kabhi jab dastan-e-gardish-e-ayyam likhta hun

kabhī jab dāstān-e-gardish-e-ayyām likhtā huuñ

to phir unvān kī sūrat meñ apnā naam likhtā huuñ

kabhī āġhāz likhtā huuñ kabhī anjām likhtā huuñ

asīrān-e-mohabbat kī jo sub.h-o-shām likhtā huuñ

jalāne lagtī hai jab shiddat-e-tishna-labī mujh ko

tirī āñkhoñ ko mai-ḳhāna nazar ko jaam likhtā huuñ

kisī par kis liye tohmat rakhūñ ḳhāna-ḳharābī kī

maiñ apne naam barbādī ke sab ilzām likhtā huuñ

mohabbat ke taqaddus ko kabhī pāmāl mat karnā

mohabbat kā yahī paiġhām sab ke naam likhtā huuñ

muḳhātab hone lagtī hai ḳhud apnī zindagī mujh se

'valī' jab bhī maiñ sharah-e-gardish-e-ayyām likhtā huuñ

kabhi jab dastan-e-gardish-e-ayyam likhta hun

to phir unwan ki surat mein apna nam likhta hun

kabhi aaghaz likhta hun kabhi anjam likhta hun

asiran-e-mohabbat ki jo subh-o-sham likhta hun

jalane lagti hai jab shiddat-e-tishna-labi mujh ko

teri aankhon ko mai-KHana nazar ko jam likhta hun

kisi par kis liye tohmat rakhun KHana-KHarabi ki

main apne nam barbaadi ke sab ilzam likhta hun

mohabbat ke taqaddus ko kabhi pamal mat karna

mohabbat ka yahi paigham sab ke nam likhta hun

muKHatab hone lagti hai KHud apni zindagi mujh se

'wali' jab bhi main sharah-e-gardish-e-ayyam likhta hun