kabhi jab mil ke rahte the wo sohbat yaad aati hai

kabhī jab mil ke rahte the vo sohbat yaad aatī hai

hameñ apne buzurgoñ kī sharāfat yaad aatī hai

kisī bhī ma.asiyat se maiñ hamesha duur rahtā huuñ

ki har lamha mujhe maañ kī nasīhat yaad aatī hai

har ik dar band kartā huuñ ki shab to chain se guzre

tū jab pahlū meñ hotā thā vo saa.at yaad aatī hai

kabhī aurāq maazī ke palaT letā huuñ fursat meñ

tirī be-kār bātoñ kī bhī hujjat yaad aatī hai

milī daulat jo duniyā kī baḌhīñ bezāriyāñ dil kī

sukūñ se jis meñ rahte the vo ġhurbat yaad aatī hai

tabī.at phir se apnī DhūñDhtī hai zā.iqa 'saifī'

hasīñ dilkash adāoñ kī bhī lazzat yaad aatī hai

kabhi jab mil ke rahte the wo sohbat yaad aati hai

hamein apne buzurgon ki sharafat yaad aati hai

kisi bhi masiyat se main hamesha dur rahta hun

ki har lamha mujhe man ki nasihat yaad aati hai

har ek dar band karta hun ki shab to chain se guzre

tu jab pahlu mein hota tha wo saat yaad aati hai

kabhi auraq mazi ke palaT leta hun fursat mein

teri be-kar baaton ki bhi hujjat yaad aati hai

mili daulat jo duniya ki baDhin bezariyan dil ki

sukun se jis mein rahte the wo ghurbat yaad aati hai

tabiat phir se apni DhunDhti hai zaiqa 'saifi'

hasin dilkash adaon ki bhi lazzat yaad aati hai