کبھی جلتا بدن دیکھا کبھی اٹھتا دھواں پایا

کبھی جلتا بدن دیکھا کبھی اٹھتا دھواں پایا

گناہوں کے تسلسل سے عذاب جاں رواں پایا

رموز بندگی ہم پر کھلے ان کے وسیلے سے

جنہیں عالم نے رحمت کا محیط بیکراں پایا

مقدر سے بھلا کیوں کر نہ اہل دل کریں شکوہ

کہ شمع جاں جلا کر بھی اندھیرا درمیاں پایا

بھرم اپنی خرد مندی کا ٹوٹا اس گھڑی جس دم

حباب دجلہ میں ہم نے سمندر کو نہاں پایا

بہار آئی چمن میں اور اسیران قفس نے بھی

نئی رت کی ہوا پائی نیا اک پاسباں پایا

مرا سر دیکھ کر بولے مرے احباب دشمن سے

یہ کس سرکش کا سر ہے جو سر نوک سناں پایا

نہ غنچہ کا نہ بلبل کا نہ ہی باد بہاری کا

چمن میں تو فقط ہم نے نشان کشتگاں پایا

خود اپنی ذات میں ہم قید ہو کر رہ گئے امجدؔ

دل ناداں کو ہم نے بھی وگرنہ خونچکاں پایا