kabhi jalta badan dekha kabhi uThta dhuan paya

kabhī jaltā badan dekhā kabhī uThtā dhuāñ paayā

gunāhoñ ke tasalsul se azāb-e-jāñ ravāñ paayā

rumūz-e-bandagī ham par khule un ke vasīle se

jinheñ aalam ne rahmat kā muhīt-e-be-karāñ paayā

muqaddar se bhalā kyūñkar na ahl-e-dil kareñ shikva

ki sham-e-jāñ jalā kar bhī añdherā darmiyāñ paayā

bharam apnī ḳhirad-mandī kā TuuTā us ghaḌī jis dam

habāb-e-dajla meñ ham ne samundar ko nihāñ paayā

bahār aa.ī chaman meñ aur asīrān-e-qafas ne bhī

na.ī rut kī havā paa.ī nayā ik pāsbāñ paayā

mirā sar dekh kar bole mire ahbāb dushman se

ye kis sarkash kā sar hai jo sar-e-nok-e-sināñ paayā

na ġhuncha kā na bulbul kā na hī bād-e-bahārī kā

chaman meñ to faqat ham ne nishān-e-kushtagāñ paayā

ḳhud apnī zaat meñ ham qaid ho kar rah ga.e 'amjad'

dil-e-nādāñ ko ham ne bhī vagarna ḳhūñ-chakāñ paayā

kabhi jalta badan dekha kabhi uThta dhuan paya

gunahon ke tasalsul se azab-e-jaan rawan paya

rumuz-e-bandagi hum par khule un ke wasile se

jinhen aalam ne rahmat ka muhit-e-be-karan paya

muqaddar se bhala kyunkar na ahl-e-dil karen shikwa

ki sham-e-jaan jala kar bhi andhera darmiyan paya

bharam apni KHirad-mandi ka TuTa us ghaDi jis dam

habab-e-dajla mein hum ne samundar ko nihan paya

bahaar aai chaman mein aur asiran-e-qafas ne bhi

nai rut ki hawa pai naya ek pasban paya

mera sar dekh kar bole mere ahbab dushman se

ye kis sarkash ka sar hai jo sar-e-nok-e-sinan paya

na ghuncha ka na bulbul ka na hi baad-e-bahaari ka

chaman mein to faqat hum ne nishan-e-kushtagan paya

KHud apni zat mein hum qaid ho kar rah gae 'amjad'

dil-e-nadan ko hum ne bhi wagarna KHun-chakan paya