kabhi jo aankh pe gesu-e-yar hota hai

kabhī jo aañkh pe gesū-e-yār hotā hai

sharāb-ḳhāne pe abr-e-bahār hotā hai

kisī kā ġham ho mire dil pe baar hotā hai

usī kā naam ġham-e-rozgār hotā hai

ilāhī ḳhair ho un be-zabāñ asīroñ kī

qafas ke sāmne zikr-e-bahār hotā hai

chaman meñ aise bhī do chaar haiñ chaman vaale

ki jin ko mausam-e-gul nāgavār hotā hai

savāl-e-jām tire mai-kade meñ ai saaqī

javāb-e-gardish-e-lail-o-nahār hotā hai

hameñ vafā pe vafā aaj tak na raas aa.ī

unheñ sitam pe sitam sāzgār hotā hai

laboñ pe aa gayā dam band ho chukīñ āñkheñ

chale bhī aao ki ḳhatm intizār hotā hai

kahāñ vo vasl kī rāteñ kahāñ ye hijr ke din

ḳhayāl-e-gardish-e-lail-o-nahār hotā hai

junūñ to ek baḌī chiiz hai mohabbat meñ

zarā se ashk se raaz āshkār hotā hai

mire janāze ko dekhā to yaas se bole

yahāñ pe aadmī be-iḳhtiyār hotā hai

ḳhudā rakhe tumheñ kyā koī jaur bhuul ga.e

jo ab talāsh hamārā mazār hotā hai

hamārā zor hai kyā bāġhbāñ uThā leñge

ye āshiyāñ jo tujhe nāgavār hotā hai

ajiib kashmakash-e-bahr-e-ġham meñ dil hai 'qamar'

na Dūbtā hai ye beḌā na paar hotā hai

kabhi jo aankh pe gesu-e-yar hota hai

sharab-KHane pe abr-e-bahaar hota hai

kisi ka gham ho mere dil pe bar hota hai

usi ka nam gham-e-rozgar hota hai

ilahi KHair ho un be-zaban asiron ki

qafas ke samne zikr-e-bahaar hota hai

chaman mein aise bhi do chaar hain chaman wale

ki jin ko mausam-e-gul nagawar hota hai

sawal-e-jam tere mai-kade mein ai saqi

jawab-e-gardish-e-lail-o-nahaar hota hai

hamein wafa pe wafa aaj tak na ras aai

unhen sitam pe sitam sazgar hota hai

labon pe aa gaya dam band ho chukin aankhen

chale bhi aao ki KHatm intizar hota hai

kahan wo wasl ki raaten kahan ye hijr ke din

KHayal-e-gardish-e-lail-o-nahaar hota hai

junun to ek baDi chiz hai mohabbat mein

zara se ashk se raaz aashkar hota hai

mere janaze ko dekha to yas se bole

yahan pe aadmi be-iKHtiyar hota hai

KHuda rakhe tumhein kya koi jaur bhul gae

jo ab talash hamara mazar hota hai

hamara zor hai kya baghban uTha lenge

ye aashiyan jo tujhe nagawar hota hai

ajib kashmakash-e-bahr-e-gham mein dil hai 'qamar'

na Dubta hai ye beDa na par hota hai