kabhi junun to kabhi aagahi ki qaid mein hun

kabhī junūñ to kabhī āgahī kī qaid meñ huuñ

maiñ apne zehn kī āvārgī kī qaid meñ huuñ

sharāb mere laboñ ko taras rahī hogī

maiñ riñd to huuñ magar tishnagī kī qaid meñ huuñ

na koī samt na jaada na manzil-e-maqsūd

yugoñ yugoñ se yūñhī be-ruḳhī kī qaid meñ huuñ

kisī ke ruḳh se jo parda uThā diyā maiñ ne

sazā ye paa.ī kī dīvāngī kī qaid meñ huuñ

ye kis ḳhatā kī sazā meñ haiñ dohrī zanjīreñ

giraft maut kī hai zindagī kī qaid meñ huuñ

na jaane kitnī naqābeñ ulaTtā jaatā huuñ

janm janm se maiñ bechārgī kī qaid meñ huuñ

yahāñ to parda-e-sīmīñ pe chal rahī hai film

maiñ jis jagah huuñ vahāñ raushnī kī qaid meñ huuñ

jahāñ maiñ qaid se chhūTūñ vahīñ pe mil jaanā

abhī na milnā abhī zindagī kī qaid meñ huuñ

ġharaz nasīb meñ likkhī rahī asīrī hī

kisī kī qaid se chhūTā kisī kī qaid meñ huuñ

gunāh ye hai ki kyuuñ apnā naam rakhā 'nūr'

vo din aur aaj kā din tīrgī kī qaid meñ huuñ

kabhi junun to kabhi aagahi ki qaid mein hun

main apne zehn ki aawargi ki qaid mein hun

sharab mere labon ko taras rahi hogi

main rind to hun magar tishnagi ki qaid mein hun

na koi samt na jada na manzil-e-maqsud

yugon yugon se yunhi be-ruKHi ki qaid mein hun

kisi ke ruKH se jo parda uTha diya main ne

saza ye pai ki diwangi ki qaid mein hun

ye kis KHata ki saza mein hain dohri zanjiren

giraft maut ki hai zindagi ki qaid mein hun

na jaane kitni naqaben ulaTta jata hun

janm janm se main bechaargi ki qaid mein hun

yahan to parda-e-simin pe chal rahi hai film

main jis jagah hun wahan raushni ki qaid mein hun

jahan main qaid se chhuTun wahin pe mil jaana

abhi na milna abhi zindagi ki qaid mein hun

gharaz nasib mein likkhi rahi asiri hi

kisi ki qaid se chhuTa kisi ki qaid mein hun

gunah ye hai ki kyun apna nam rakha 'nur'

wo din aur aaj ka din tirgi ki qaid mein hun