kabhi kabul kabhi Dhaka kabhi rangun se nikle

kabhī kābul kabhī Dhāka kabhī rangūn se nikle

na jaane kitne hī dariyā hamāre ḳhuun se nikle

ham apnā nafs-e-ammāra samajhne se rahe qāsir

kitāb-e-nafs paḌh kar aage aflātūn se nikle

ijāzat maiñ nahīñ dūñgā mirā dil toḌ jaane kī

mire dil se jo nikle qā.ede qānūn se nikle

ise to bolne vaalā hī ab behtar batā.egā

hazāroñ jhuuT kaise ek telephone se nikle

ye puure saal mazdūroñ ke māthe se Tapaktā hai

pasīna kyā zarūrī hai ki ḳhālī june se nikle

atā kī hai ḳhudā ne in ko rangat surḳh-e-yāqūtī

tumhāre hoñT haiñ yā phir samar zaitūn se nikle

guzar jab jab huā hai 'nūr' bāzār-e-mohabbat se

bachā kar apnī āñkheñ ham har ik ḳhātūn se nikle

kabhi kabul kabhi Dhaka kabhi rangun se nikle

na jaane kitne hi dariya hamare KHun se nikle

hum apna nafs-e-ammara samajhne se rahe qasir

kitab-e-nafs paDh kar aage aflatun se nikle

ijazat main nahin dunga mera dil toD jaane ki

mere dil se jo nikle qaede qanun se nikle

ise to bolne wala hi ab behtar bataega

hazaron jhuT kaise ek telephone se nikle

ye pure sal mazduron ke mathe se Tapakta hai

pasina kya zaruri hai ki KHali june se nikle

ata ki hai KHuda ne in ko rangat surKH-e-yaquti

tumhaare honT hain ya phir samar zaitun se nikle

guzar jab jab hua hai 'nur' bazar-e-mohabbat se

bacha kar apni aankhen hum har ek KHatun se nikle