kabhi kabhaar bhi kab saeban kisi ne diya

kabhī kabhār bhī kab sā.ebāñ kisī ne diyā

na haath sar pe ba-juz āsmāñ kisī ne diyā

nisār maiñ tirī yādoñ kī chhatriyoñ pe nisār

na is tarah kā kabhī sā.ebāñ kisī ne diyā

hamāre paañv bhī apne nahīñ haiñ aur sar bhī

zamīñ kahīñ se milī āsmāñ kisī ne diyā

bikā thā kal bhī to ik zehan chand sikkoñ meñ

sanad kisī ko milī imtihāñ kisī ne diyā

ulajh paḌā thā vo mālik-makān se ik din

phir is ke ba.ad na us ko makāñ kisī ne diyā

tū itne ġham ko sambhālegā kis tarah 'nāsik'

agar tujhe bhī ġham-e-bekarāñ kisī ne diyā

kabhi kabhaar bhi kab saeban kisi ne diya

na hath sar pe ba-juz aasman kisi ne diya

nisar main teri yaadon ki chhatriyon pe nisar

na is tarah ka kabhi saeban kisi ne diya

hamare panw bhi apne nahin hain aur sar bhi

zamin kahin se mili aasman kisi ne diya

bika tha kal bhi to ek zehan chand sikkon mein

sanad kisi ko mili imtihan kisi ne diya

ulajh paDa tha wo malik-makan se ek din

phir is ke baad na us ko makan kisi ne diya

tu itne gham ko sambhaalega kis tarah 'nasik'

agar tujhe bhi gham-e-bekaran kisi ne diya