kabhi kabhi kitna nuqsan uThana paDta hai

kabhī kabhī kitnā nuqsān uThānā paḌtā hai

airoñ ġhairoñ kā ehsān uThānā paḌtā hai

TeḌhe-meḌhe rastoñ par bhī ḳhvāboñ kā pashtāra

terī ḳhātir merī jaan uThānā paḌtā hai

kab suntā hai naala koī shor-sharābe meñ

majbūrī meñ bhī tūfān uThānā paḌtā hai

kaisī havā.eñ chalne lagī haiñ mere bāġhoñ meñ

phūloñ ko bhī ab sāmān uThānā paḌtā hai

gul-daste kī ḳhvāhish rakhne vāloñ ko aksar

koī ḳhaar bharā gul-dān uThānā paḌtā hai

yaañ koī tafrīq nahīñ hai shaah gadā sab ko

apnā bojh dil-e-nādān uThānā paḌtā hai

yuuñ māyūs nahīñ hote haiñ koī na koī ġham

achchhe achchhoñ ko har aan uThānā paḌtā hai

makkāroñ kī is duniyā meñ kabhī kabhī 'ālam'

achchhe logoñ ko bohtān uThānā paḌtā hai

kabhi kabhi kitna nuqsan uThana paDta hai

airon ghairon ka ehsan uThana paDta hai

TeDhe-meDhe raston par bhi KHwabon ka pashtara

teri KHatir meri jaan uThana paDta hai

kab sunta hai nala koi shor-sharabe mein

majburi mein bhi tufan uThana paDta hai

kaisi hawaen chalne lagi hain mere baghon mein

phulon ko bhi ab saman uThana paDta hai

gul-daste ki KHwahish rakhne walon ko aksar

koi KHar bhara gul-dan uThana paDta hai

yan koi tafriq nahin hai shah gada sab ko

apna bojh dil-e-nadan uThana paDta hai

yun mayus nahin hote hain koi na koi gham

achchhe achchhon ko har aan uThana paDta hai

makkaron ki is duniya mein kabhi kabhi 'alam'

achchhe logon ko bohtan uThana paDta hai