کبھی کبھی تری آواز پر رکوں بھی نہیں

کبھی کبھی تری آواز پر رکوں بھی نہیں

کہ تو بلائے مجھے اور میں سنوں بھی نہیں

اس انتظار میں ضد کا بھی ایک پہلو ہے

کواڑ کھول دوں اور راستہ تکوں بھی نہیں

تمام شہر سنے مجھ کو تیرے ہونٹوں سے

ترے سوا میں کسی اور پہ کھلوں بھی نہیں

وہ دور ہو تو لگے اس سے کوئی رشتہ ہے

قریب آئے تو میں اس کا کچھ لگوں بھی نہیں

لکھے گا کون ادھوری تلاش کا نوحہ

تری طلب کا مرے سر میں اب جنوں بھی نہیں

نہ جانے ٹوٹ کے گر جائے کب سروں پہ شکیلؔ

کہ آسماں کی عمارت میں اک ستوں بھی نہیں