kabhi kabhi to gham-e-rozgar haT jae

kabhī kabhī to ġham-e-rozgār haT jaa.e

mire ḳhayāl kā dāman koī ulaT jaa.e

vahī hai ahl-e-safar ko shu.ūr kī manzil

nigāh-e-rahbar-e-manzil jahāñ palaT jaa.e

rahī hai husn kī jānib se ehtiyāt bahut

vo kyā kareñ agar āñchal hī ḳhud ulaT jaa.e

pahuñch rahā hai diloñ tak yaqīn-e-nūr-e-sahar

gumān-e-shab se kaho rāste se haT jaa.e

ham ahl-e-dard tire ġham meñ jī bhī sakte haiñ

nigāh-e-lutf-o-karam bhī agar simaT jaa.e

ye jāntā huuñ ki hai zindagī hasīn bahut

magar vo din jo tirī aarzū meñ kaT jaa.e

mirī nigāh ne sab kā ġhurūr dekhā hai

andherī raat se kah do zarā simaT jaa.e

ye iḳhtilāf-e-nazar aur ham-nashīnoñ meñ

ki merā zehn tirī anjuman se haT jaa.e

kabhi kabhi to gham-e-rozgar haT jae

mere KHayal ka daman koi ulaT jae

wahi hai ahl-e-safar ko shuur ki manzil

nigah-e-rahbar-e-manzil jahan palaT jae

rahi hai husn ki jaanib se ehtiyat bahut

wo kya karen agar aanchal hi KHud ulaT jae

pahunch raha hai dilon tak yaqin-e-nur-e-sahar

guman-e-shab se kaho raste se haT jae

hum ahl-e-dard tere gham mein ji bhi sakte hain

nigah-e-lutf-o-karam bhi agar simaT jae

ye jaanta hun ki hai zindagi hasin bahut

magar wo din jo teri aarzu mein kaT jae

meri nigah ne sab ka ghurur dekha hai

andheri raat se kah do zara simaT jae

ye iKHtilaf-e-nazar aur ham-nashinon mein

ki mera zehn teri anjuman se haT jae