kabhi kahkashan se guzar gaya kabhi aasman se guzar gaya

kabhī kahkashāñ se guzar gayā kabhī āsmāñ se guzar gayā

tujhe kuchh ḳhabar bhī hai be-ḳhabar maiñ kahāñ kahāñ se guzar gayā

kabhī bhuul kar bhī zabān par agar aaya naam bahār kā

vahīñ ek sho.ala-e-barq-e-dam mire āshiyāñ se guzar gayā

jise tū ne dekh kar ik nazar kabhī phir na muḌ ke nigāh kī

liye dil meñ diid kī aarzū vahī is jahāñ se guzar gayā

na thā koī gul jo nasīb kā to kamī thī kaun sī ḳhaar kī

liye maiñ ġham-e-tahī-dāmanī bhare gulsitāñ se guzar gayā

thī ajiib ishq kī be-ḳhudī ki zabān husn kī ban ga.ī

tirā tazkira thā vahāñ vahāñ maiñ jahāñ jahāñ se guzar gayā

jise dhun ho terī talāsh kī use kyā nasheb-o-farāz se

mujhe kuchh bhī is kā pata nahīñ maiñ kahāñ se guzar gayā

kahāñ mujh meñ itnā kamāl thā tirā lutf shāmil-e-hāl thā

jo maiñ jheltā huā saḳhtiyāñ har ik imtihāñ se guzar gayā

na to shauq-e-jehd-e-baqā ghaTā na to shān-e-zabt-e-fuġhāñ miTī

maiñ tire hujūm-e-ḳhayāl meñ ġham-e-do-jahāñ se guzar gayā

ye nahīñ ki pās-e-adab na thā mirī be-ḳhudī kā sabab ye thā

tire āstāñ hī kī fikr meñ tire āstāñ se guzar gayā

nahīñ jis kā aap ko kuchh pata ye vahī thā 'nātiq'-e-be-navā

ġham-o-dard kā liye kārvāñ jo abhī yahāñ se guzar gayā

kabhi kahkashan se guzar gaya kabhi aasman se guzar gaya

tujhe kuchh KHabar bhi hai be-KHabar main kahan kahan se guzar gaya

kabhi bhul kar bhi zaban par agar aaya nam bahaar ka

wahin ek shoala-e-barq-e-dam mere aashiyan se guzar gaya

jise tu ne dekh kar ek nazar kabhi phir na muD ke nigah ki

liye dil mein did ki aarzu wahi is jahan se guzar gaya

na tha koi gul jo nasib ka to kami thi kaun si KHar ki

liye main gham-e-tahi-damani bhare gulsitan se guzar gaya

thi ajib ishq ki be-KHudi ki zaban husn ki ban gai

tera tazkira tha wahan wahan main jahan jahan se guzar gaya

jise dhun ho teri talash ki use kya nasheb-o-faraaz se

mujhe kuchh bhi is ka pata nahin main kahan se guzar gaya

kahan mujh mein itna kamal tha tera lutf shamil-e-haal tha

jo main jhelta hua saKHtiyan har ek imtihan se guzar gaya

na to shauq-e-jehd-e-baqa ghaTa na to shan-e-zabt-e-fughan miTi

main tere hujum-e-KHayal mein gham-e-do-jahan se guzar gaya

ye nahin ki pas-e-adab na tha meri be-KHudi ka sabab ye tha

tere aastan hi ki fikr mein tere aastan se guzar gaya

nahin jis ka aap ko kuchh pata ye wahi tha 'natiq'-e-be-nawa

gham-o-dard ka liye karwan jo abhi yahan se guzar gaya