kabhi KHandan kabhi giryan kabhi raqsa chaliye

kabhī ḳhandāñ kabhī giryāñ kabhī raqsā chaliye

duur tak saath tire umr-e-gurezāñ chaliye

rasm-e-derīna-e-ālam ko badalne ke liye

rasm-e-derīna-e-ālam se gurezāñ chaliye

āsmānoñ se barastā hai añdherā kaisā

apnī palkoñ pe liye jashn-e-charāġhāñ chaliye

shola-e-jāñ ko havā detī hai ḳhud bād-e-sumūm

shola-e-jāñ kī tarah chāk-garebāñ chaliye

aql ke nuur se dil kījiye apnā raushan

dil kī rāhoñ se sū-e-manzil-e-insāñ chaliye

ġham na.ī sub.h ke taare kā bahut hai lekin

le ke ab parcham-e-ḳhurshīd-e-daraḳhshāñ chaliye

sar-ba-kaf chalne kī aadat meñ na farq aa jaa.e

kūcha-e-dār meñ sar-mast-o-ġhazal-ḳhvāñ chaliye

kabhi KHandan kabhi giryan kabhi raqsa chaliye

dur tak sath tere umr-e-gurezan chaliye

rasm-e-derina-e-alam ko badalne ke liye

rasm-e-derina-e-alam se gurezan chaliye

aasmanon se barasta hai andhera kaisa

apni palkon pe liye jashn-e-charaghan chaliye

shola-e-jaan ko hawa deti hai KHud baad-e-sumum

shola-e-jaan ki tarah chaak-gareban chaliye

aql ke nur se dil kijiye apna raushan

dil ki rahon se su-e-manzil-e-insan chaliye

gham nai subh ke tare ka bahut hai lekin

le ke ab parcham-e-KHurshid-e-daraKHshan chaliye

sar-ba-kaf chalne ki aadat mein na farq aa jae

kucha-e-dar mein sar-mast-o-ghazal-KHwan chaliye