kabhi KHizan kabhi kaifiyyat-e-bahaar to hai

kabhī ḳhizāñ kabhī kaifiyyat-e-bahār to hai

ye dhuup chhāñv kā mausam bhī ḳhush-gavār to hai

havā chaman kī na raas aa sakī to is se kyā

hamāre ḳhuun se ḳhaak us kī lāla-zār to hai

ye aur baat ki fitrat ko said kar na sake

sabīl chunñe kā insāñ ko iḳhtiyār to hai

hamāre ġham kā mudāvā mile mile na mile

hamārī jehd se hāsil hameñ qarār to hai

sahāb-e-dard kā saaya ghanā hai aaj bahut

chaḌhegī dhuup magar kal ye e.atibār to hai

ye baat tai hai ki dil kā jumūd TūTegā

fazā-e-zehn pe chhāyā huā ġhubār to hai

nigāh-e-naqd kī taskīñ ke vāste 'jauhar'

mire kalām meñ talḳhī-e-ḳhush-gavār to hai

kabhi KHizan kabhi kaifiyyat-e-bahaar to hai

ye dhup chhanw ka mausam bhi KHush-gawar to hai

hawa chaman ki na ras aa saki to is se kya

hamare KHun se KHak us ki lala-zar to hai

ye aur baat ki fitrat ko said kar na sake

sabil chunne ka insan ko iKHtiyar to hai

hamare gham ka mudawa mile mile na mile

hamari jehd se hasil hamein qarar to hai

sahab-e-dard ka saya ghana hai aaj bahut

chaDhegi dhup magar kal ye eatibar to hai

ye baat tai hai ki dil ka jumud TuTega

faza-e-zehn pe chhaya hua ghubar to hai

nigah-e-naqd ki taskin ke waste 'jauhar'

mere kalam mein talKHi-e-KHush-gawar to hai